Iohannis Aegidii Ruceriensis, epigramma ad iuvenes

Quid teris ignavum damnosa per otia tempus

      Immemor aetatis culta iuventa brevis.

Semper eunt tacito fugientia tempora motu

      Hinc redit ad primos lapsa nec hora dies.

5

Fers modo longinquas vestigia crebra per urbes

      Nunc teris incertis compita cuncta viis.

Haec sectatores levitas turpissima vanos

      Reddit et ingenii semina lenta rudis.

Dum tua sunt viridi forentia corda sub aevo

10

      Et cupis ore novo verba diserta loqui.

Ingeniosa legas nitidi monumenta laboris

      Si placeant studiis comica dicta tuis.

Splendet enim lepidi comoedia grata Terenti

      Omnia perspicuo sensa decore nitent.

15

Moribus ingenui doctrina serena Guidonis

      Tersit difficiles arte nitente locos.

Hinc tibi compositas clari Ciceronis ad artes

      Vtile iam facili tramite carpis iter.

Inde novam celebris si mox interpretis artem

20

      Verba vel attenta mente voluta legens.

Inclyta Donati solertis scripta patebunt,

      Sit licet in variis pagina scabra locis.

Omnia perfaciles sunt nota vocabula scaenas

      Vana nec interpres verba disertus habet.

25

Hic quoque Romano cultissima lingua lepore

      Et terso lepidos edet ab ore sales.

Candidus ecce Guido iuvenes miseratus inertes

      Tradidit ingenii commoda dona pii.

Tuque Palaemoniae sectator idoneus artis

30

      Tradita sub memori dona reconde sinu.

Et meritas agito facili pro codice grates

      Non sunt ingratis munera digna viris.

Otia sed fugias studiis invisa severis

      Nullus ab ignavo pectore surgit honor.

35

Vt primum pigros serpet cava ruga per artus

      Plorabit stultos tarda senecta dies.

Assiduum tolera nunc tota mente laborem

      Aetas ne insolitum curva recuset onus.

Exerce studiis virides ferventibus annis

40

      Perpetuum claris stet decus ingeniis.